ছুইজাৰলেণ্ডৰ দাভোসত আজিৰ পৰা (১৯ জানুৱাৰী ২০২৬) আৰম্ভ হৈছে ‘ৱৰ্ল্ড ইকনমিক ফৰাম’ (WEF) অৰ্থাৎ বিশ্ব অৰ্থনৈতিক মঞ্চৰ ৫৬ সংখ্যক বাৰ্ষিক সন্মিলন। আজিৰে পৰা পাঁচদিনীয়া কাৰ্যসূচীৰে আৰম্ভ হোৱা ‘ৱৰ্ল্ড ইকনমিক ফৰাম’ৰ ২০২৬ বৰ্ষৰ বাৰ্ষিক বৈঠকৰ মূল থিম বা বিষয়বস্তু হৈছে “A Spirit of Dialogue”. সমগ্ৰ বিশ্বতে এতিয়া অৰ্থনৈতিক অনিশ্চয়তা, যুদ্ধৰ দৰে পৰিস্থিতি আৰু কৃত্ৰিম বুদ্ধিমত্তাৰ দৰে প্ৰযুক্তিৰ দ্ৰুত প্ৰসাৰে এক খেলিমেলিৰ সৃষ্টি কৰিছে। এনে এক জটিল সময়ত বিভিন্ন দেশৰ চৰকাৰ, ডাঙৰ ব্যৱসায়িক গোষ্ঠী আৰু আন্তঃৰাষ্ট্ৰীয় প্ৰতিষ্ঠানসমূহৰ মাজত পুনৰ বন্ধুত্ব আৰু সহযোগিতা গঢ়ি তোলাটোৱে এই সন্মিলনৰ প্ৰধান লক্ষ্য।
এইবাৰৰ সন্মিলনত ভাৰতৰ ভূমিকা অত্যন্ত গুৰুত্বপূৰ্ণ। ভাৰতৰ পৰা এক শক্তিশালী প্ৰতিনিধি দল দাভোসত উপস্থিত হৈছে, য’ত আশ্বিনী বৈষ্ণৱ, শিৱৰাজ সিং চৌহানৰ দৰে ৪ গৰাকী কেন্দ্ৰীয় মন্ত্ৰীৰ লগতে অসমৰ মুখ্যমন্ত্ৰী হিমন্ত বিশ্ব শৰ্মাসহ দেশৰ ৬ গৰাকী মুখ্যমন্ত্ৰীয়ে অংশ লৈছে। ইয়াৰ উপৰি মুকেশ আম্বানী আৰু এন চন্দ্ৰশেখৰণৰ দৰে ১০০ তকৈও অধিক শীৰ্ষ ব্যৱসায়ীয়েও এই আলোচনাত যোগ দিছে। আগন্তুক পাঁচটা দিনত ইয়াত জলবায়ু পৰিৱৰ্তন, গোলকীয় বাণিজ্য আৰু বিশেষকৈ ‘ভাৰত কেনেকৈ বিশ্বৰ তৃতীয় বৃহত্তম অৰ্থনীতি হ’ব পাৰে’— এই সন্দৰ্ভত গুৰুত্বপূৰ্ণ আলোচনা হোৱাৰ সম্ভাৱনা আছে।
এইবাৰৰ দাভোস সন্মিলনত পাঁচটা বিশেষ দিশৰ ওপৰত গুৰুত্ব আৰোপ কৰা হৈছে:
• অৰ্থনৈতিক স্থিতিস্থাপকতা: বিশ্ব অৰ্থনীতিৰ মন্থৰ গতিৰ মাজতে দেশসমূহে কেনেকৈ নিজৰ অৰ্থনীতি মজবুত কৰি ৰাখিব পাৰে, সেই বিষয়ে আলোচনা কৰা হ’ব।
• কৃত্ৰিম বুদ্ধিমত্তা (AI): AI-ৰ জৰিয়তে হোৱা অৰ্থনৈতিক উন্নয়নৰ বিপৰীতে কৰ্মসংস্থাপন কেনেকৈ সুৰক্ষিত কৰিব পাৰি, সেইটো এক ডাঙৰ প্ৰত্যাহ্বান। নেতাসকলে ইয়াত বিত্তীয় স্থিৰতা আৰু নৈতিক শাসন নিশ্চিত কৰাৰ ওপৰত বিতৰ্ক কৰিব।
• শক্তিৰ ৰূপান্তৰ: পৰিৱেশ সুৰক্ষা নিশ্চিত কৰি কেনেকৈ পৰম্পৰাগত শক্তিৰ পৰা নৱীকৰণযোগ্য শক্তিলৈ ধাৱমান হ’ব পাৰি, তাৰ এক নক্সা তৈয়াৰ কৰা হ’ব।
• গোলকীয় বিপদাশংকা আৰু ভূ-ৰাজনীতি: বৰ্তমানৰ যুদ্ধ সদৃশ পৰিস্থিতি আৰু আন্তঃৰাষ্ট্ৰীয় সম্পৰ্কৰ অৱনতি কেনেকৈ ৰোধ কৰিব পাৰি, সেই সন্দৰ্ভত আলোচনা হ’ব।
• জলবায়ু বিত্তীয় সাহায্য: উন্নয়নশীল দেশসমূহে জলবায়ু পৰিৱৰ্তনৰ সৈতে যুঁজিবলৈ কেনেকৈ পুঁজি লাভ কৰিব পাৰে আৰু বিশ্বব্যাপী যোগান শৃংখল কেনেকৈ শক্তিশালী কৰিব পাৰি, সেয়াও হ’ব কাৰ্যসূচীৰ গুৰুত্বপূৰ্ণ অংশ।
ভাৰতৰ বাবে দাভোস এক অত্যন্ত গুৰুত্বপূৰ্ণ মঞ্চ। ইয়াৰ জৰিয়তে ভাৰতে বিশ্বৰ আগত নিজৰ চৰকাৰী নীতিৰ ধাৰাবাহিকতা, সংস্কাৰৰ গতি আৰু গোলকীয় পুঁজিৰ বাবে মুকলি দুৱাৰৰ কথা প্ৰকাশ কৰিব পাৰে। বৰ্তমান বিশ্বৰ আটাইতকৈ দ্ৰুতগতিত বৃদ্ধি পোৱা বৃহৎ অৰ্থনীতি হিচাপে ভাৰতে নিজকে কেৱল ভৱিষ্যতৰ সুযোগ হিচাপেই নহয়, বৰঞ্চ বিশ্বব্যাপী অৰ্থনৈতিক উন্নয়নৰ এক বৰ্তমানৰ চালিকা শক্তি হিচাপে উপস্থাপন কৰিছে। ভাৰতৰ মূল লক্ষ্য হ’ল দীৰ্ঘম্যাদী বিনিয়োগ আকৰ্ষণ কৰা, গোলকীয় মূল্য শৃংখলৰ সৈতে একত্ৰিত হোৱা আৰু উৎপাদন, ডিজিটেল আন্তঃগাঁথনি তথা স্বচ্ছ শক্তিৰ ক্ষেত্ৰত অংশীদাৰিত্ব শক্তিশালী কৰা।
এইবাৰ ভাৰতে এতিয়ালৈকে সৰ্ববৃহৎ ব্যৱসায়িক প্ৰতিনিধি দলসমূহৰ এটা দাভোসললৈ প্ৰেৰণ কৰিছে। বেংকিং, প্ৰযুক্তি, উৎপাদন, ষ্টাৰ্টআপ আৰু নবীকৰণযোগ্য শক্তি খণ্ডৰ ১০০ৰো অধিক শীৰ্ষ ব্যৱসায়ীয়ে ইয়াত অংশ লৈছে। অংশগ্ৰহণকাৰীসকলৰ ভিতৰত মুকেশ আম্বানী, এন চন্দ্ৰশেখৰণ, সুনীল ভাৰতী মিট্টল আৰু নন্দন নীলকণিৰ দৰে প্ৰভাৱশালী ব্যক্তিত্ব আছে। দাভোস ২০২৬ত ভাৰতৰ মূল লক্ষ্য হৈছে— উৎপাদন ক্ষমতা বৃদ্ধি কৰা, ডিজিটেল ৰাজহুৱা আন্তঃগাঁথনি, এ-আই (AI) নেতৃত্ব, স্বচ্ছ শক্তিৰ ৰূপান্তৰ আৰু দীৰ্ঘম্যাদী গোলকীয় পুঁজি আকৰ্ষণ কৰা।
উৎস- সংবাদ সংস্থা
