বিশেষ প্ৰতিবেদন: বিশ্ব বেংকৰ কাৰ্যবাহী সঞ্চালক মণ্ডলীয়ে আজি অসমৰ বাবে তিনিটা বিশেষ প্ৰকল্পত অনুমোদন জনাইছে। এই প্ৰকল্পসমূহৰ উদ্দেশ্য হ’ল চৰম বতৰজনিত পৰিস্থিতিৰ (extreme weather events) বিৰুদ্ধে অসমৰ স্থিতিস্থাপকতা বৃদ্ধি কৰা, চৰকাৰী শাসন ব্যৱস্থা আৰু সেৱা প্ৰদানৰ মান উন্নত কৰা আৰু ৪ নিযুততকৈও অধিক শিক্ষাৰ্থীক কৰ্মসংস্থাপনৰ বাবে প্ৰয়োজনীয় দক্ষতাৰে গঢ়ি তোলা।
ভাৰতৰ উত্তৰ-পূবৰ প্ৰাণকেন্দ্ৰ অসমৰ ভৌগোলিক গুৰুত্ব এতিয়া বিশ্বই স্বীকাৰ কৰিছে। অসম কেৱল এখন ৰাজ্যই নহয়, ই হ’ল দক্ষিণ-পূব এছিয়াৰ বিশাল বজাৰখনৰ সৈতে সংযোগ স্থাপনৰ এক প্ৰধান ‘গে’টৱে’ বা দুৱাৰমুখ। কৌশলগতভাৱে অসমৰ এই অৱস্থানে আঞ্চলিক বাণিজ্য আৰু আন্তঃৰাষ্ট্ৰীয় সম্পৰ্ক বৃদ্ধিৰ ক্ষেত্ৰত এক সোণালী সুযোগ কঢ়িয়াই আনিছে। চুবুৰীয়া দেশসমূহৰ সৈতে বেপাৰ-বাণিজ্য বৃদ্ধি কৰি অসমক এখন শক্তিশালী অৰ্থনৈতিক কেন্দ্ৰ হিচাপে গঢ়ি তোলাৰ সম্পূৰ্ণ সম্ভাৱনা আছে।
কিন্তু এই উজ্জ্বল সম্ভাৱনাৰ মাজতো অসমৰ সমুখত কেইবাটাও জটিল বাধা আছে। ৰাজ্যখন সঘনাই বানপানী আৰু জলবায়ু পৰিৱৰ্তনৰ দৰে প্ৰাকৃতিক দুৰ্যোগৰ কৱলত পৰে, যিয়ে সাধাৰণ মানুহৰ জীৱন আৰু সম্পত্তিৰ প্ৰভূত ক্ষতি কৰে। ইয়াৰ উপৰি, উন্নত আন্তঃগাঁথনিৰ অভাৱ আৰু বিভিন্ন ধৰণৰ দৰিদ্ৰতাই আজিও ৰাজ্যখনৰ বহু লোকক পিছুৱাই ৰাখিছে। এনে প্ৰত্যাহ্বানবোৰৰ বাবেই ৰাজ্যখনত যি হাৰত উন্নয়ন হ’ব লাগিছিল, সেয়া আজিও সম্পূৰ্ণৰূপে সম্ভৱ হৈ উঠা নাই। গতিকে, অসমক সঁচাকৈয়ে এক অৰ্থনৈতিক শক্তি হিচাপে গঢ়ি তুলিবলৈ হ’লে এই সমস্যাবোৰ সমাধান কৰাটো অতি জৰুৰী।
অসমৰ দুৰ্গম পাহাৰীয়া অঞ্চলসমূহৰ যাতায়াত ব্যৱস্থাত এক আমূল পৰিৱৰ্তন আনিবলৈ বিশ্ব বেংকে ৩৫০ নিযুত আমেৰিকান ডলাৰৰ (প্ৰায় ২৯০০ কোটি টকা) এক বৃহৎ প্ৰকল্পত অনুমোদন জনাইছে। ‘অসম দুৰ্যোগ সহনশীল পাহাৰীয়া পথ উন্নয়ন প্ৰকল্প’ (Assam Disaster Resilient Hill Roads Development Project) নামৰ এই আঁচনিখনৰ জৰিয়তে এনেকুৱা পথ নিৰ্মাণ কৰা হ’ব যিবোৰ বানপানী বা ভূমিস্খলনৰ দৰে প্ৰাকৃতিক দুৰ্যোগৰ সময়তো অটুট থাকিব। এই প্ৰকল্পৰ দ্বাৰা বিশেষকৈ জনজাতীয় আৰু গ্ৰাম্য অঞ্চলৰ প্ৰায় ১.৯০ লাখ লোক পোনপটীয়াকৈ উপকৃত হ’ব আৰু তেওঁলোকৰ যাতায়াতৰ সময় বহুখিনি কমি যাব।
এই প্ৰকল্পৰ আন এক বিশেষত্ব হ’ল অসমৰ উত্তৰ-পূব প্ৰান্তৰ জিলাসমূহৰ বাবে আধুনিক পৰিবহন আৰু লজিষ্টিক হাব (Logistics Hub) নিৰ্মাণ কৰা। এই কেন্দ্ৰসমূহত ট্ৰাক আৰু কণ্টেইনাৰ ৰখাৰ সুকীয়া ঠাই (Bays), টেক্সী আৰু বাছ আস্থানৰ লগতে বৈদ্যুতিক বাহনৰ বাবে ই-চাৰ্জিং পইণ্টৰ সুবিধাও থাকিব। ইয়াৰ ফলত কেৱল মানুহৰ যাতায়াত সহজ হোৱাই নহয়, বৰঞ্চ অঞ্চলটোৰ ব্যৱসায়-বাণিজ্যৰ ক্ষেত্ৰতো এক নতুন গতি আহিব।
অসমৰ শিক্ষা খণ্ডত এক বৈপ্লৱিক পৰিৱৰ্তন অনাৰ লক্ষ্যৰে বিশ্ব বেংকে ২৫০ নিযুত আমেৰিকান ডলাৰৰ (প্ৰায় ২,১০০ কোটি টকা) এক বৃহৎ প্ৰকল্পত অনুমোদন জনাইছে। ‘অসম: বিদ্যালয় শিক্ষা আৰু কিশোৰ কুশলতা প্ৰকল্প’ (Assam: School Education and Adolescent Wellbeing Project) নামৰ এই আঁচনিখনে ৰাজ্যখনৰ ২০ লাখতকৈও অধিক প্ৰাথমিক বিদ্যালয়ৰ শিক্ষাৰ্থীৰ শিক্ষাৰ মানদণ্ড উন্নত কৰাত সহায় কৰিব। ইয়াৰ উপৰি, আন ২০ লাখ কিশোৰ-কিশোৰীক (১০-১৯ বছৰ বয়সৰ) ভৱিষ্যতৰ কৰ্মসংস্থাপনৰ বাবে সাজু কৰি তোলা হ’ব। ইয়াৰ বাবে তেওঁলোকক বিশেষ জীৱন-শৈলীৰ প্ৰশিক্ষণ (life-skills training) দিয়াৰ লগতে পাঠ্যক্ৰমৰো আধুনিকীকৰণ কৰা হ’ব, য’ত বহুভাষিক শ্ৰেণীকোঠাৰ দৰে উন্নত সুবিধা অন্তৰ্ভুক্ত থাকিব।
অসম চৰকাৰৰ কাম-কাজ অধিক স্বচ্ছ আৰু ক্ষিপ্ৰ কৰি তোলাৰ লক্ষ্যৰে বিশ্ব বেংকে ৮০ নিযুত আমেৰিকান ডলাৰৰ (প্ৰায় ৬৬০ কোটি টকা) এক গুৰুত্বপূৰ্ণ কাৰ্যসূচীত অনুমোদন জনাইছে। ‘অসম সুশাসন আৰু সেৱা প্ৰদান কাৰ্যসূচী’ (Assam Governance and Service Delivery Program) নামৰ এই প্ৰকল্পটোৱে ৰাজ্যৰ ৰাজহুৱা বিত্তীয় ব্যৱস্থাপনা অধিক শক্তিশালী কৰিব। ইয়াৰ জৰিয়তে চৰকাৰী ধনৰ আবণ্টন আৰু ব্যয় সঠিকভাৱে নিৰীক্ষণ কৰাৰ লগতে সাধাৰণ ৰাইজ আৰু ব্যৱসায়ীসকলক দিয়া চৰকাৰী সেৱাসমূহ উন্নত কৰা হ’ব। লগতে, অসমৰ সামগ্ৰিক তথ্য পৰিকাঠামো বা ডাটা ইক’চিষ্টেমটোও অধিক উন্নত কৰি তোলা হ’ব।
উৎস- সংবাদ সংস্থা
