নতুন দিল্লী: ২০২৬ চনত ভাৰতৰ নেতৃত্বত অনুষ্ঠিত হ’বলগীয়া ব্ৰিকছ (BRICS) সন্মিলনৰ বাবে চৰকাৰী প্ৰস্তুতি এতিয়া তুংগত। বৈদেশিক পৰিক্ৰমা মন্ত্ৰী এছ. জয়শংকৰে মঙলবাৰে এই সন্মিলনৰ বাবে নিৰ্ধাৰিত আনুষ্ঠানিক ৱেবছাইট আৰু ল’গ’ মুকলি কৰে। অনুষ্ঠানত ভাষণ দি জয়শংকৰে কয় যে ২০২৬ চনৰ বাবে ভাৰতৰ অধ্যক্ষতাৰ লক্ষ্য হ’ব অত্যন্ত স্পষ্ট আৰু সুনিৰ্দিষ্ট। সমগ্ৰ বিশ্বতে যি এক অনিশ্চয়তা আৰু অৰ্থনৈতিক জটিলতাই দেখা দিছে, তেনে সময়ত ব্ৰিকছ দেশসমূহৰ সামূহিক শক্তিক ব্যৱহাৰ কৰি কেনেকৈ জনসাধাৰণৰ কল্যাণ সাধন কৰিব পাৰি, ভাৰতে তাৰ ওপৰতে বিশেষ গুৰুত্ব দিব। নতুন দিল্লীৰ এই পদক্ষেপে এতিয়া আন্তৰ্জাতিক ৰাজনীতিত এক নতুন মাত্ৰা যোগ কৰিব বুলি আশা কৰা হৈছে।
২০২৬ চনত ভাৰতে ব্ৰিকছৰ অধ্যক্ষতা গ্ৰহণ কৰিবলৈ ওলোৱা এই সময়ছোৱা কিয় ইমান গুৰুত্বপূৰ্ণ, তাৰ এক সুন্দৰ ব্যাখ্যা আগবঢ়াইছে বৈদেশিক পৰিক্ৰমা মন্ত্ৰী এছ. জয়শংকৰে। তেওঁ উল্লেখ কৰে যে ২০২৬ বৰ্ষটো হ’ব ব্ৰিকছৰ যাত্ৰাৰ ২০ বছৰীয়া মাইলৰ খুঁটি। এই ২০ বছৰত ব্ৰিকছ এতিয়া কেৱল পাঁচখন দেশৰ গোট হৈ থকা নাই; ই সমগ্ৰ বিশ্বৰ উদীয়মান অৰ্থনীতি আৰু উন্নয়নশীল দেশসমূহৰ বাবে সহযোগিতাৰ আটাইতকৈ ডাঙৰ মঞ্চ হৈ পৰিছে। জয়শংকৰে কয় যে পৃথিৱীখন যিদৰে সলনি হৈছে, সেইদৰে ব্ৰিকছেও নিজৰ লক্ষ্য আৰু সদস্যৰ সংখ্যা বৃদ্ধি কৰিছে। কিন্তু আটাইতকৈ ডাঙৰ কথাটো হ’ল,—এই গোটটোৱে সদায় জনসাধাৰণৰ সুবিধা আৰু উন্নয়নৰ কথাহে চিন্তা কৰে। ভাৰতৰ অধ্যক্ষতাত গোটটোৱে এই আলোচনা আৰু বাস্তৱিক কাম-কাজবোৰক অধিক গতিশীল কৰাৰ ওপৰত গুৰুত্ব দিব ।
২০২৬ চনত ভাৰতে যেতিয়া ব্ৰিকছৰ অধ্যক্ষতা কৰিব, তেতিয়া ভাৰতৰ কাম-কাজৰ মূল মন্ত্ৰ হ’ব ‘মানৱতা প্ৰথম’। বৈদেশিক পৰিক্ৰমা মন্ত্ৰী এছ. জয়শংকৰে স্পষ্ট কৰি দিছে যে প্ৰধানমন্ত্ৰী নৰেন্দ্ৰ মোদীৰ দূৰদৰ্শী নিৰ্দেশনাৰেই ভাৰতে এই দায়িত্ব পালন কৰিব। এইবাৰৰ সন্মিলনৰ বাবে ভাৰতে যিটো মূল বিষয় বা ‘থিম’ বাছি লৈছে, সেয়া হ’ল— স্থিতিৰোধক ক্ষমতা, নতুন উদ্ভাৱন, পাৰস্পৰিক সহযোগিতা আৰু বহনক্ষম ভৱিষ্যতৰ বাবে কাম কৰা। ভাৰতে বিশ্বাস কৰে যে যদি ব্ৰিকছৰ সদস্য দেশবোৰে একগোট হৈ কাম কৰে, তেন্তে বিশ্বৰ ডাঙৰ ডাঙৰ সমস্যাবোৰ অতি সহজে আৰু সকলোৰে বাবে সমানে লাভজনক হোৱাকৈ সমাধান কৰিব পৰা যাব। জয়শংকৰে পুনৰ দোহাৰে যে ভাৰতৰ বাবে ‘সবকা সাথ, সবকা বিকাশ’ কেৱল এটা শ্ল’গান নহয়, বৰঞ্চ ব্ৰিকছৰ মঞ্চতো ভাৰতে প্ৰতিজন ব্যক্তিৰ উন্নয়ন নিশ্চিত কৰাৰ ওপৰতে আটাইতকৈ বেছি জোৰ দিব।
ভাৰতৰ অধ্যক্ষতাত হ’বলগীয়া ২০২৬ চনৰ ব্ৰিকছ সন্মিলনৰ ল’গ’টো কেৱল এটা চানেকি নহয়, বৰঞ্চ ইয়াৰ আঁৰত লুকাই আছে এক গভীৰ তাৎপৰ্য। বৈদেশিক পৰিক্ৰমা মন্ত্ৰী এছ. জয়শংকৰে এই ল’গ’টোৰ ব্যাখ্যা দি কয় যে ইয়াৰ মূল অৰ্থই হৈছে ‘বিচিত্ৰতাৰ মাজত ঐক্য’। ল’গ’টোৰ ডিজাইনত ভাৰতীয় পৰম্পৰাৰ লগতে আধুনিকতাৰ স্পৰ্শ দিয়া হৈছে। ইয়াত থকা ফুলৰ পাপৰিবোৰত ব্ৰিকছৰ প্ৰতিখন সদস্য দেশৰ নিজা ৰঙৰ ব্যৱহাৰ কৰা হৈছে। ইয়াৰ জৰিয়তে ভাৰতে বিশ্বক এই বাৰ্তাই দিব বিচাৰিছে যে আমাৰ সকলোৰে পৰিচয় বা সংস্কৃতি বেলেগ হ’লেও আমাৰ লক্ষ্য কিন্তু একেই। জয়শংকৰৰ মতে, এই ল’গ’টোৱে প্ৰমাণ কৰে যে ব্ৰিকছৰ প্ৰকৃত শক্তি ইয়াৰ বৈচিত্ৰ্যৰ মাজতহে লুকাই আছে, আৰু একগোট হৈ কাম কৰিলে আমি যিকোনো লক্ষ্যত উপনীত হ’ব পাৰিম।
২০২৬ বৰ্ষৰ ব্ৰিকছ সন্মিলনক অধিক স্বচ্ছ আৰু তথ্যসমৃদ্ধ কৰি তুলিবলৈ ভাৰতে মুকলি কৰিছে এক বিশেষ ‘ব্ৰিকছ ইণ্ডিয়া’ ৱেবছাইট। বৈদেশিক পৰিক্ৰমা মন্ত্ৰী এছ. জয়শংকৰে জনায় যে এই ৱেবছাইটটোৱে কেৱল তথ্যৰ ভঁৰাল হিচাপেই নহয়, বৰঞ্চ এক উমৈহতীয়া ডিজিটেল মঞ্চ হিচাপে কাম কৰিব। কেতিয়া ক’ত বৈঠক হ’ব, কি কি নতুন আঁচনি লোৱা হৈছে আৰু সেইবোৰৰ ফলাফল কি হ’ল— এই সকলোবোৰ কথা এতিয়াৰে পৰা ইয়াৰ জৰিয়তে পৃথিৱীৰ যিকোনো প্ৰান্তৰ পৰা জানিব পৰা যাব। জয়শংকৰৰ মতে, বৰ্তমান সমগ্ৰ বিশ্বতে যি যুদ্ধংদেহি পৰিৱেশ, অৰ্থনৈতিক মন্দাৱস্থা আৰু জলবায়ু পৰিৱৰ্তনৰ দৰে গুৰুতৰ সমস্যাই দেখা দিছে, তেনে সময়ত ব্ৰিকছৰ দৰে এটা গোটৰ প্ৰাসংগিকতা বহুত বাঢ়ি গৈছে। আমাৰ দেশৰ উন্নতিৰ বাবে যিবোৰ বিষয় দৰকাৰী, সেইবোৰক গুৰুত্ব দি সকলো দেশৰ সৈতে কথা-বতৰা আৰু বাস্তৱিক কাম-কাজ চলাই নিবলৈ ব্ৰিকছ হ’ব আটাইতকৈ উপযুক্ত মাধ্যম।
উৎস- সংবাদ সংস্থা
